Бүгүн, 25-декабрда, IV Элдик Курултайдын жүрүшүндө Садыр Жапаровдун катышуусу менен өлкө аймагындагы бир катар социалдык объектилер жана өндүрүш ишканалары онлайн форматта ачылып, расмий түрдө ишке берилди.
Президенттин катышуусундагы онлайн ачылышка Жети-Өгүз районунун Жети-Өгүз айыл аймагына караштуу Желе-Дөбө айылындагы 100 орундуу «Бүбүш эне» атындагы бала бакчасы жана Чырак айылындагы «Демир Груп» ЖЧКсынын ишканасы кошулуп, ишмердүүлүгүн баштады.
Ачылыш аземдерине Жети-Өгүз райондук мамлекеттик администрациясынын башчысы – акимдин биринчи орун басары Аджиев Кадырбек Замирович, акимдин орун басары Бектемирова Жыпаркүл Кутмүдүновна, ошондой эле тиешелүү райондук мекеме-ишканалардын жетекчилери, айыл өкмөттөрүнүн башчылары жана айыл тургундары катышышты.
Бул объектилердин ишке берилиши жергиликтүү калк үчүн социалдык кызматтардын жеткиликтүүлүгүн кеңейтип, жаңы жумуш орундарын түзүүгө жана аймактын социалдык-экономикалык өнүгүшүнө олуттуу салым кошот.
